Shto detaje që do t'u pëlqejnë vizitorëve

Kur vizitorët hyjnë në "The Beach Lodge" në Hollywood Beach, Kaliforni, ata e krijojnë menjëherë një ide se kush është Tiffany Caliva-Talledo. Kujdesi që ajo tregon dhe dashuria për arredimin ndihet përmes zgjedhjeve të saj në dekore, ngjyra, materiale dhe në çdo detaj të personalizuar. Si ish-drejtoreshë krijuese, detajet kanë qenë gjithmonë kyçe për të. Këtu, ajo na tregon sekretet e suksesit të saj në Airbnb.

“Para se ta rregullonim, "The Beach Lodge" ishte një shtëpi e shëmtuar me barëra të kalbur. Njerëzit e quanin "Biruca e të droguarve" dhe largoheshin me shpejtësi kur kalonin aty! Fqinjët mendua se ishim të çmendur që e blemë, por unë pashë diçka të veçantë në atë shtëpi dhe mendova se po ta rindërtonim, njerëzit do të vinin. Kam derdhur aq shumë dashuri në të dhe mendoj se vizitorët kthehen pikërisht për këtë arsye.”

Krijo një atmosferë
"Krijimi i përvojave të paharrueshme fillon gjithmonë me krijimin e atmosferës së duhur. Kur arredoj një hapësirë, u them klientëve të mi të fillojnë nga një ndjesi, jo nga një tematikë. Çfarë ndjesie dëshiron të ndiejnë vizitorët kur shkelin në shtëpinë tënde; rehati, gëzim, qetësi? Për "The Beach Lodge", në vend që të zgjidhja një frymë plotësisht bregdetare, mendova në tërësi për ngjyrat, materialet dhe detajet: motive që kontrastojnë mes ngjyrave të lehta neutrale, materiale që të kujtojnë rërën dhe shumë bimë për të sjellë natyrën brenda."

Arredim brenda buxhetit
“Dekorimi nuk ka pse të jetë i shtrenjtë! Tregjet e mallrave të përdorura dhe dyqanet e mallrave antike janë të mbushura me gjëra shumë të mira jo të shtrenjta dhe objekte unike që duket sikur kanë pas një histori. Mjafton të gërmosh pak mirë. Më kanë tërhequr veçanërisht objektet që përfaqësojnë trashëgiminë time filipinase dhe aziatike. Artikujt që zgjedh për hapësirën tënde duhet të përcjellin një mesazh, kështu të gjitha së bashku do të rrëfejnë një histori më të plotë të shtëpisë sate.”

Guxo të bësh ndryshime
"Një këshillë tjetër që u jap klientëve të mi është që t'i lejosh vetes të guxosh të bësh ndryshime. Ndrysho dekorin. Provo gjëra të reja. Bëj ndryshime çdo sezon. Kjo është mënyra më e mirë për të zbuluar se çfarë funksionon dhe çfarë jo për atë që po përpiqesh të arrish. Konsideroje hapësirën tënde si një njeri me kompleksitetet dhe karakterin e tij. Ashtu si ti, ajo duhet të ndryshojë dhe të zhvillohet vazhdimisht për të qenë versioni më i mirë i vetes në çdo moment.”

Krijo mini arratisje
“Më pëlqen të luaj me hapësirën dhe efektet vizuale në mënyra të veçanta. Një sugjerim që rekomandoj është të krijosh mini arratisje përreth shtëpisë. Zona të vogla pushimi ku vizitorët mund të përhumben me një libër. Mund të shtoj batanije, jastëkë dhe një pikturë në një qoshe, në mënyrë që t'i ftoj njerëzit të çlodhen plotësisht. Mendo se si mund t'i krijosh këto qoshe të vogla frymëzuese nëpër ambient.”

Jepi karakter personal
"Kur është e mundur, personalizoje qëndrimin e vizitorëve të tu me detaje të veçanta. Për shembull, nëse dikush më thotë se po feston ditëlindjen, do t'i lë disa kekë të vegjël nga furrat e mia të preferuara. Nëse janë vegane, do të krijoj një listë restorantesh të zonës. Nëse është një familje me fëmijë, jastëkët dhe çarçafët do t'i ndërroj me të tjerë më të qëndrueshëm. Këto detaje të mirëmenduara u bëjnë vërtet përshtypje vizitorëve. Këtë gjë do ta vëresh të pasqyrohet në recensionet që do të marrësh dhe në përsëritjen e prenotimeve.”

Dhuroju atyre diçka që ta marrin me vete në shtëpi
"Do të rekomandoja që t‘i japësh vizitorëve një kujtim ose një dhuratë kur mbërrijnë, si një gjest i thjeshtë që të bën të ndihesh mirë dhe i mirëpritur, si karta dhuratë për bizneset në afërsi ose kartolina nga artistë vendas."

"Për ta çuar këtë ide edhe më tej, vizitorët mund të blejnë artikuj direkt nga "The Beach Lodge", duke përfshirë robdeshambre dhe çarçafë me materiale ekologjike plus objekte antike, ose nga dyqani online që kam krijuar. Kam përfshirë edhe marka në pronësi të grave dhe marka lokale, që janë të rëndësishme për mua. Unë nuk kam asnjë fitim. Bëhet fjalë thjesht për t'i njohur njerëzit me këto marka. Është shumë më tepër sesa një pushim i thjeshtë për mua.”

Merr drejtimin e anijes sate
"Shtëpinë tonë e quajtëm "The Beach Lodge" sepse, sipas nesh, një lozhë është një hapësirë komode ku mund të mblidhen njerëzit. E pajis me lojëra tavoline, tapete joge, objekte artizanati, materiale arti, një skarë për barbekju, peshqirë plazhi, biçikleta, libra për t'u përhumbur dhe një gramafon. Udhëtimi ka të bëjë me zgjerimin e horizonteve të tua dhe këto aktivitete mund t'i ndihmojnë njerëzit të krijojnë kujtime dhe forma të reja të vetes së tyre. Mendo se çfarë shërbimesh mund të ndihmojnë në përmirësimin e përvojës së tyre të përgjithshme.”

Mos harro se çelësi janë gjithmonë detajet, detajet, detajet! Me këto prekje të kujdesshme, vizitorët do ta ndiejnë vërtet kujdesin që i ke kushtuar hapësirës sate dhe do të vazhdojnë të kthehen.

Mëso më shumë se si të bëhesh pritës