Çfarë masash merr një superpritës për të respektuar mjedisin

Shprehja “ndërgjegjësim për mjedisin” duket si e ngatërruar. Por në të vërtetë nuk është.

Kam filluar të vë në jetë praktika të përditshme që çdo person normal mund të përvetësojë. Kompostimi është një ritual i ndërgjegjshëm për mjedisin që mund t'u vijë ndërmend shumë njerëzve. Nëse ti mund ta bësh, shkëlqyeshëm! Por unë nuk e bëj këtë. Ka shumë mënyra të lehta dhe ekonomike për të reduktuar, ripërdorur dhe ricikluar mbetjet.

Topat e tharëses së rrobave më kanë kursyer 10 deri 15 minuta për çdo lavatriçe që vë dhe bën një ndryshim të madh kur kam prenotime njëri pas tjetrit. Jo vetëm që zvogëlojnë konsumin e energjisë, por janë një alternativë më e përshtatshme për mjedisin sesa fletët njëpërdorimëshe të tharëses. Si përfundim, të dyja arsyet të bëjnë të kursesh para.

Unë përdor shumë artikuj vintage. Pse të blesh një artikull të ri të prodhuar në masë kur ka shumë artikuj unikë shumëpërdorimësh që janë prodhim më i mirë dhe kanë më shumë karakter? Qoftë edhe rregullimi i një jastëku të karriges ose ndërrimi i mbulesës së një abazhuri të pluhurosur në garazh bën një ndryshim të madh.

Jemi të rrethuar nga fusha bujqësore, ndaj më pëlqen t'u jap vizitorëve fruta dhe perime nga fermerët vendas. Kjo ndihmon në mbështetjen e komunitetit tonë, minimizon gjurmët tona të karbonit duke blerë produkte vendase dhe rrit ndërgjegjësimin e vizitorëve tanë për bollëkun që Oxnard, Kaliforni, ka për të ofruar.

Shtëpiza në plazh është dy blloqe larg tregut të fermerëve dhe pesë minuta me makinë nga stendat bujqësore, kështu që unë lë çanta shumëpërdorimëshe për vizitorët që ata t'i përdorin kur dalin për pazar.

Jemi 50 hapa larg një plazhi të pastër me vlerësime të larta. Fatkeqësisht, gjithnjë e më shumë plazhistë të rinj po lënë mbeturina që kthehen në ndotje për oqeanin. Dua të sigurohem që njerëzit që qëndrojnë në shtëpinë tonë të mos e rëndojnë edhe më tepër situatën. Kjo është arsyeja pse ne ofrojmë gota shumëpërdorimëshe dhe kuti magazinimi.

Ka shumë pritës që përpiqen t'i shtojnë pikë vetes duke ofruar verë, por unë mendoj se pritja e vizitorëve në mënyrë të ndërgjegjshme për mjedisin është një tjetër qasje po aq e vlefshme për të ofruar diçka të veçantë. Zgjedhja e praktikave në dobi të mjedisit jo vetëm që do të jetë diçka e mirë për planetin, por mund të nxisë gjithashtu ndërgjegjësimin e vizitorëve të tu për mjedisin.

Po përpiqemi të ekuilibrojmë gjërat. Ndërsa po ulim përdorimin e letrës me peshqirë prej cope, u lëmë vizitorëve gjithsesi një rulon pecetash letre për t'ua lënë atyre në dorë zgjedhjen. Megjithatë, ne sigurohemi që pecetat e letrës dhe letrat higjienike të jenë prej bambuje, letre të ricikluar ose letre të certifikuar nga PEFC.

Qeset ekologjike të mbeturinave janë të shkëlqyera në teori, por nga studimi im rezulton se qeset me bazë bimore priren të shpohen apo të grisen nga disa lloje mbeturinash. Nuk mund të rrezikoj ta bëj këtë me vizitorët, sepse nuk e di se çfarë po hedhin në plehra. Kuzhina jonë është në katin e tretë, kështu që e urrej faktin që qeset mund të grisen para se një vizitor të arrinte t'i hidhte në koshat në katin përdhe. Megjithëse qeset e degradueshme biologjikisht të plehrave nuk bëjnë për rastin tim, është fantastike nëse mund ta bësh të funksionojë.

Vizitorët shpesh lënë ushqim të pahapur që mund t'u dhurohet organizatave bamirëse. Është një mënyrë e thjeshtë për të ndihmuar nevojtarët e komunitetit tënd. Vërtet që mund të të duhet t'i çosh vetë tek organizatat bamirëse, por ama shiko ndikimin pozitiv që ka kjo gjë.

Qëllimi im këtë vit është t'u tregoj ndjekësve të mi në Instagram që të gjitha këto gjëra janë të arritshme dhe të ndërgjegjshme për mjedisin. Shpresojmë që jo vetëm vizitorët e ardhshëm ta vlerësojnë shtysën e praktikave tona të ndërgjegjshme për mjedisin, por edhe pritësit që po na ndjekin të kuptojnë gjithashtu ndikimin që mund të ketë ndërgjegjësimi për mjedisin në banesat e tyre.

PARA: Si po i shndërrojnë pritësit banesat e tyre në Airbnb në mënyrë të ndërgjegjshme për mjedisin

Informacioni në këtë artikull mund të ketë ndryshuar që nga publikimi.