Si të zgjerosh biznesin tënd me anë të Përvojave

Mëngjese të përgatitura në shtëpi, shëtitje më këmbë, aktivitete në lagje e të tjera. Superpritësit i tejkalojnë pritshmëritë kur bëhet fjalë për t'i bërë vizitorët të ndihen të mirëpritur. Në fakt, rreth 30%* e pritësve të banesave në Airbnb kanë ofruar shëtitje dhe aktivitete për vizitorët. E madje disa pritës i kanë zyrtarizuar këto oferta duke i zgjeruar në përmasat e një përvoje.

Merr për shembull superpritësit Patricia Ramos dhe Oscar Fernandez, që ishin ndër pritësit e parë të përvojave në Kubë. Që të dy janë profesorë ekonomie në Universitetin e Havanës dhe filluan si pritës banesash. Ata tani organizojnë gjithashtu katër përvoja: një aventurë kulturore dyditore në Havanë dhe në zonat rurale; një shëtitje gjysmëditore në Havanën autentike; një ekskursion njëditor në fshatrat kubane për të mbjellë kafe, për të rritur kafshë dhe për të jetuar me prodhimet e tokës; si dhe një bisedë dyorëshe për ekonominë dhe shoqërinë kubane, për Cuba Libre ose pijet e tjera sipas dëshirës. Përveç kësaj, "i kemi inkurajuar miqtë tanë të organizojnë 15 përvoja të tjera,” tha Oscar.

Patricia dhe Oscar na treguan se si e çuan sipërmarrjen e tyre në një nivel tjetër.

Si fillove me përvojat?
Oscar: "Kalonim dy orë me çdo vizitor në momentin që mbërrinin, sepse donim t'u tregonim gjithçka që dinim për Kubën. Dhe na pëlqente shumë se na dukej sikur ishim profesorë dhe ata një lloj tjetër studentësh."

Patricia: "Pastaj njerëzit filluan të shkruajnë recensione për ne dhe për [shëtitjet tona të improvizuara]. Pra, kur Airbnb prezantoi përvojat në Kubë, menduam "Përse të mos krijojmë një përvojë si ajo që jemi duke bërë në momentin e mbërritjes?'”

Na trego për përvojën tënde të parë "Aventura e një kubani". Çfarë e bën atë unike?
Patricia: “Në pjesën më të madhe, vizitorët ndërkombëtarë që vijnë në Kubë presin të dëgjojnë për duhanin, rumin dhe muzikën salsa. Por ajo që donim të bënim ne ishte që t'u tregonim vizitorëve diçka më shumë: si funksionon sistemi arsimor, sistemi shëndetësor dhe tregjet, si jetojnë njerëzit me paga kaq të ulëta. Bëjmë së bashku një shëtitje më këmbë nëpër qytet dhe u tregojmë atyre vende që nuk janë për turistët, si Coppelia që është mbretëria e akulloreve. Pesë kupa akullore kushtojnë rreth 25 cent dollarë. Duhet të presësh në radhë rreth 30 minuta, por në këtë mënyrë njerëzit shoqërizohen e madje bëjnë edhe takime ndërsa presin. Kjo është një pamje e përmbledhur e shoqërisë kubane. I marrim gjithashtu vizitorët të lëvizin me transport publik, gjë që nuk është aspak e zakontë [për turistët]. Në fund të ditës, ata ndihen se kanë bërë diçka shumë të madhe dhe mund të thonë se si jetojnë në të vërtetë kubanët në një shoqëri socialiste.”

Cili është aspekti më pozitiv i të qenit një pritës përvojash?
Oscar: "Dijet dhe zgjerimi i njohurive kulturore janë diçka e jashtëzakonshme. Çdo herë, ti ndan kulturën tënde. Duke qenë ende profesorë në universitet, i inkurajojmë kolegët tanë më të rinj që ta organizojnë përvojën së bashku me ne. Mendojmë gjithashtu se Airbnb ka krijuar vende pune dhe ka përmirësuar jetë. Në përvojën tonë “Jeta në fshat”, i çojmë vizitorët tanë në një zonë rurale për t'u takuar me miqtë e familjes tonë që jetojnë me prodhimet e tokës, duke peshkuar dhe duke mbjellë fruta dhe kafe. Tani i çojmë atje vizitorë rreth tre herë në javë, kështu që tani edhe miqtë tanë janë sipërmarrës.”

Ke ndonjë këshillë për pritësit e tjerë që mendojnë për krijimin e një përvoje?
Patricia: "Gjithçka ka të bëjë me faktin nëse ke diçka për të ndarë dhe nëse vërtet dëshiron ta ndash atë me të tjerët.”

Oscar: "Sepse të jesh i hapur për vizitorët është gjëja më e rëndësishme. Duhet të jesh vetvetja dhe i vërtetë, përndryshe nuk do të korrësh sukses. "

*Bazuar në kërkimet e brendshme të Airbnb për më shumë se 100 pritës.

Informacioni në këtë artikull mund të ketë ndryshuar që nga publikimi.