A është hapësira ime e përshtatshme për Airbnb?

Mund të mendosh se një dhomë gjumi e lirë ose një varkë e rehatshme me vela mund të mos pëlqehen në Airbnb, por të gjitha llojet e hapësirave, nga më e vogla deri te më e madhja, mund t'i tërheqin vizitorët.

Pavarësisht se çfarë lloj ambienti ke, e rëndësishme është të krijosh një ambient komod për të fjetur, në të cilin do të mund të qëndroje edhe vetë dhe një përshkrim i detajuar i listimit që tregon se çfarë e bën hapësirën tënde tërheqëse.

Minimumi që presin vizitorët është një ambient i pastër e i rehatshëm për gjumë dhe një banjë. Jo të gjithë ambientet e publikuara në Airbnb ofrojnë kuzhinë, por nëse ua ofron vizitorëve të tu, specifiko nëse do të kenë një kuzhinë të plotë ose një kënd kuzhine.

Kushdo që ka pak hapësirë të lirë për të dhënë me qira, mund të korrë sukses si pritës në Airbnb. Nuk ekziston ambienti "ideal". Mjafton të tregohesh transparent dhe të japësh sa më shumë detaje përmes përshkrimit dhe fotografive të listimit, për t'i ndihmuar vizitorët të kuptojnë se çfarë të presin. Ekziston një hapësirë perfekte për të gjithë në Airbnb, duke filluar nga dhomat rezervë e deri te pronat luksoze.

Pothuajse çdo lloj prone mund t'i tërheqë vizitorët në Airbnb. Është shtëpi? Një apartament? Një dhomë në apartament kondominial? Disa ambiente cilësohen edhe si unike, të tilla si shtëpitë mbi pemë, tendat, shtëpizat, agroturizme dhe kamperë e rulota.

Mund t'u thuash vizitorëve se do të kenë qasje ekskluzive në të gjithë pronën tënde, në një suitë private ose se do të ndajnë hapësira të tilla si zona e gjumit, kuzhina ose banja me njerëz të tjerë, si familja jote, shokët e dhomës ose vizitorë të tjerë. Varet nga ti nëse ua kushton plotësisht hapësirën tënde vizitorëve apo mban aty edhe sendet e tua. Ajo që ka rëndësi është që ta mbash hapësirën të pastër dhe të komunikosh me vizitorët për atë që duhet të presin.

Daniel, një pritës në San Francisko, thotë se është gjithmonë transparent për ambientin e tij. "Çfarë u thua vizitorëve të tu se do të gjejnë dhe çfarë gjejnë realisht kur mbërrijnë në listimin tënd duhet të përputhen" - thotë ai. "Është më mirë të mos e mbivlerësosh listimin tënd, në mënyrë që vizitorët të gjejnë një ambient edhe më të këndshëm se ç'e prisnin, se sa e kundërta."

Nëse vizitorët mund të ndeshin kafshë shtëpiake në një hapësirë të përbashkët, do të ishte mirë ta përmendje këtë gjë si fillim. Por edhe më e rëndësishme është të ngarkosh fotografi të qenit ose maces tënde në Airbnb, me një diçiturë që u bën të ditur vizitorëve se ka të ngjarë të ndeshen me një kafshë.

Fotografitë vlejnë sa një mijë fjalë, aq më tepër kur ka vizitorë që bëjnë një rezervim pa lexuar gjithçka deri në fund. Nëse hapësira jote ka veçori unike, do të ishte mirë të konfirmoje gjatë procesit të prenotimit nëse vizitorët e kanë lexuar plotësisht përshkrimin e listimit.

Hapësira jote nuk është pallat? S'ka problem! Shumë vizitorë e vlerësojnë qëndrimin në një ambient modest për aq kohë sa raporti çmim-cilësi është i duhuri për ta. Në fillimet e tua, mund të caktosh një çmim fillestar pak më të ulët se ai që synon. Kjo do të të ndihmojë të tërheqësh vizitorë dhe pasi të kesh marrë disa recensione të shkëlqyera, mund ta rivlerësosh dhe ta rritësh çmimin për të pasqyruar objektivat e tua.

Lexo udhëzuesin për të mësuar se si të krijosh një listim të suksesshëm

Informacioni në këtë artikull mund të ketë ndryshuar që nga koha e publikimit.