Si të krijosh një hapësirë ftuese dhe të rehatshme

Çfarëdolloj hapësire të japësh me qira në Airbnb, mund të bësh disa gjëra të thjeshta për ta bërë atë ftuese dhe të rehatshme ndërsa përgatitesh të presësh vizitorët e parë.

Elementët e veçantë të arredimit mund ta bëjnë hapësirën më të rehatshme dhe më ftuese, pa qenë nevoja të jenë të komplikuara apo të shtrenjta.

Ja disa sugjerime për një arredim të mirëmenduar:

• Vendos objekte që nxjerrin në pah personalitetin tënd, si copëza kujtimesh nga udhëtimet e tua
• Mos lër shumë hapësira boshe, që mund të krijojnë ndjesinë e një ambienti të ftohtë dhe pa jetë
• Zgjidh një paletë ngjyrash dhe kombino veprat e artit, tekstilet dhe detajet e tjera
• Konsidero të vendosësh një objekt që bie në sy, si për shembull një abazhur të madh ose një kolltuk të stërmadh
• Dekoroje ambientin me bimë ose lule për të shtuar gjallëri

Duhet të sigurosh minimalisht letër higjienike, sapun, nga një peshqir dhe jastëk për çdo vizitor, si dhe çarçafë për çdo krevat.

Gjithashtu, vizitorët vlerësojnë edhe:

• Peshqirë, batanije dhe jastëkë rezervë
• Shampo dhe balsam
• Tharëse flokësh
• Produkte bazë si kafe, çaj dhe një ibrik
• Produkte pastrimi bazë
  

Merr më shumë informacion për shërbimet

Dhoma e gjumit është vendi ku vizitorët do të flenë dhe do të ruajnë sendet e tyre, prandaj është e rëndësishme ta bësh atë të rehatshme. Mendo se çfarë do të të ndihmonte ty vetë të ndiheshe si në shtëpi në ambientin e dikujt tjetër.

Ajo që mund të bësh:

• Siguro hapësirë të mjaftueshme për sendet personale duke vendosur një komo me sirtarë bosh, një dollap me disa kremastarë bosh ose një mbajtëse valixhesh
• Vendos një komodinë pranë krevatit me një abazhur, në mënyrë që vizitorët t'i mbajnë pranë krevatit syzet, telefonin ose librin
• Siguro një dyshek cilësor, disa jastëkë shtesë dhe batanije të buta për të mundësuar nivele të ndryshme rehatie
• Shto disa bimë, një pasqyrë, një kanë dhe një gotë uji, një adaptor universal dhe një karikues të përshtatshëm për shumë lloje telefonash, për ta bërë dhomën e gjumit sa më mikpritëse

Mund t'i ndihmosh vizitorët ta shijojnë qëndrimin e tyre duke bërë disa gjëra më shumë që e bëjnë mikpritjen tënde edhe më të shkëlqyer.

1. Sistemo rrëmujën. Nëse jeton edhe ti vetë në hapësirën që po ndan me vizitorët, është e rëndësishme të marrësh parasysh sendet që mban jashtë dhe ato që heq mënjanë. Sistemimi dhe vendosja e sendeve të tua personale në mënyrë të kujdesshme, mund ta bëjë hapësirën të duket më e madhe dhe më ftuese.

2. Jep udhëzime. Bëjua të qartë vizitorëve se si t'i përdorin gjithë pajisjet dhe shërbimet (si oxhaku me gaz, ajri i kondicionuar ose dera e garazhit) në dispozicion të tyre. Këto udhëzime mund t'i përfshish në manualin e shtëpisë.

3. Kalo një natë në ambient. Qëndrimi gjatë natës në ambientin tënd herë pas here të ndihmon të kuptosh më mirë se çfarë mungon apo ka nevojë për përmirësim. A duket ambienti i ngrohtë dhe ftues? A ke gjithçka që të nevojitet për t'u ndier rehat dhe si në shtëpi? Ndryshoji gjërat derisa të mund t'u përgjigjesh "po" të dyja këtyre pyetjeve.

4. Mbaji gjërat pastër. Pavarësisht nëse e pastron hapësirën vetë apo punëson një profesionist, është e rëndësishme ta mbash banesën të rregullt dhe të ndjekësh procesin e pastrimit me pesë hapa, para dhe pas çdo qëndrimi. Mund të shtosh një tarifë pastrimi për të mbuluar koston e kohës sate apo të pastruesit. Për të të ndihmuar të përgatitësh hapësirën tënde për vizitorët, kemi krijuar një listë kontrollesh që mund të përdorësh.