Zbulo fuqinë e pasaportës së pritësit

Vizitorët na kanë thënë se para se të rezervojnë një dhomë, duan të dinë se me kë do ta ndajnë hapësirën. Pasaporta e pritësit është një mënyrë për t'u prezantuar dhe për të vendosur pritshmëritë e vizitorëve.

Pasaporta e pritësit merr detajet kryesore nga profili yt dhe i nxjerr në rezultatet e kërkimit "Dhomat". Vizitorëtmund të shtypin fotografinë tënde për të lexuar gjithçka që ke ndarë për veten tënde. Ose mund të shkojnë direkt në faqen e listimit tënd, ku do të gjejnë informacione të ngjashme të shfaqura nën titullin "Njihu me pritësin tënd".

Emri, vitet si pritës, vlerësimi me yje dhe numri i recensioneve të vizitorëve shfaqen në krye të pasaportës së pritësit. Kjo pasohet nga çdo detaj personal që dëshiron të shtosh, si puna, hobi, gjuhët, fakte argëtuese, emri i kafshës shtëpiake dhe çfarë e bën qëndrimin në ambientin tënd të veçantë.

Modifiko profilin për të shtuar detaje në pasaportën tënde. Provo këto sugjerime për të bërë një fotografi që do të lërë përshtypje të parë të mirë.

Pasaporta jote si pritës është një mënyrë e shkëlqyer për të ndërtuar marrëdhënien me vizitorët. Të mësosh se ndan një interes të përbashkët, një linjë pune ose shije në muzikë krijon një ndjesi familjariteti.

"Pritësi nuk ka pse të jetë miku im më i mirë, por duhet të jetë dikush me të cilin ndihem mirë të ndaj një hapësirë", thotë Stacey, një vizitore me vendqëndrim në Oklahoma City. "Pasaporta e pritësit nxjerr në pah anën e tij njerëzore dhe ndihmon në përcaktimin e tonit për vizitën."

Marrja e më shumë detajeve paraprakisht gjithashtu i ndihmon vizitorët të vendosin nëse ambienti yt është i përshtatshëm për nevojat e tyre të udhëtimit, duke ju kursyer kohë dhe energji. "Redukton shkëmbimin e mesazheve dhe e bën prenotimin edhe më të lehtë, sepse pyetjet e mia tashmë kanë marrë përgjigje", thotë Stacey.

Për Chris, një superpritës në Macon, Georgia, pasaporta e pritësit është një mënyrë e thjeshtë për të thyer akullin me vizitorët. "Jam një person i qetë dhe më ka ndihmuar të hapem më shumë", thotë ai. "Mundohem ta bëj profilin tim argëtues dhe të përshtatshëm".

Në pasaportën e tij si pritës, Chris thotë se është një atlet në pension dhe ambasador superpritës. Gjithashtu ndan se:

• Shpenzon shumë kohë duke luajtur golf

• Ka një qen me emrin Princess

• Ka lindur në vitet '80

• Ka luajtur futboll amerikan për dy kolegje/universitete historikisht për njerëz me ngjyrë

• Ofron një kënd bar kafeje për vizitorët

Kur gjen kohë për t'u dhënë vizitorëve pak më shumë informacion para se të prenotojnë dhomën tënde, mund të të ndihmojë të përshtatesh me vizitorët që kanë zakone dhe interesa të ngjashme.

Siç vëren vizitorja Stacey, "Nëse lexoj se pritësi ‘kalon shumë kohë’ duke kënduar karaoke, e di se do të presë një lloj tjetër vizitori sesa një pritës që ‘kalon shumë kohë’ në banesë duke parë Netflix."

Plotëso pasaportën e pritësit duke shkuar te profili yt në Airbnb dhe duke zgjedhur "Modifiko" ose duke shtypur butonin e mëposhtëm.

Informacioni në këtë artikull mund të ketë ndryshuar që nga publikimi.