Si ta përgatitësh hapësirën tënde dhe vizitorët për zjarret natyrore

Sezonet e zjarreve natyrore po prekin jetën e pritësve dhe të vizitorëve në mbarë botën. Është më e rëndësishme se kurrë të kesh plane në rast zjarresh natyrore, për të mbrojtur veten, vizitorët dhe pronën tënde.

Në Airbnb, e marrim shumë seriozisht sigurinë tënde dhe atë të vizitorëve të tu. Si pjesë e Trust & Safety Advisory Coalition të prezantuar kohët e fundit, po bashkëpunojmë me International Association of Fire Chiefs (IAFC) për të ndarë materiale burimore rreth sigurisë nga zjarret natyrore, në mënyrë që të mund të ndihmosh edhe ti në ruajtjen e sigurisë së pronës sate dhe t'u japësh vizitorëve informacione të rëndësishme që mund të jenë të dobishme në rast emergjence.

Ke gjithmonë mundësinë të planifikosh paraprakisht në rast zjarresh natyrore në komunitetin tënd. Programi Ready, Set, Go! i IAFC është një burim i shkëlqyer për sugjerime rreth sigurisë nga zjarret natyrore. Edhe pse programi është me bazë në SHBA, sugjerimet e tij mund të zbatohen për këdo në botë.

Ja disa nga sugjerimet e IAFC:

• Hiq bimësinë e rritur së tepërmi deri në 9 metra nga shtëpia, garazhi dhe ndërtesat e tjera në pronën tënde, për të ndihmuar në krijimin e hapësirës mbrojtëse.
• Përdor sipërfaqe të forta si betoni, guri ose pllakat, një metër e gjysmë rreth bazës së shtëpisë tënde.
• Përdor bimësi të qëndrueshme ndaj zjarrit dhe që nuk rritet shumë dhe barishtore kur mbjell në zona afër shtëpisë.
• Priti degët e ulëta për të krijuar të paktën 2 metra distancë midis barishteve, shkurreve dhe pemëve më të larta.

Për t'u informuar në vazhdimësi gjatë pritjes së vizitorëve, mund të regjistrohesh për lajmërime emergjente në zonën ku ndodhet prona jote. Shumica janë të disponueshme në faqen e internetit të qytezës, qytetit ose shtetit tënd. Në këtë mënyrë mund të marrësh informacion rreth asaj që po ndodh edhe nëse nuk je në afërsi ndërsa ke vizitorë.

Disa vizitorë mund të udhëtojnë nga zona që nuk janë prekur nga zjarret natyrore dhe mund të mos i kuptojnë rreziqet. Në çdo rast, mund t'i ndihmosh vizitorët të qëndrojnë të përgatitur.

Provoji këto këshilla nga Ready, Set, Go!:

• Shto te rregullat e shtëpisë informacione bazë për pasojat e zjarreve natyrore, në mënyrë që vizitorët të jenë të vetëdijshëm që përpara prenotimit se mund të ketë zjarre natyrore.
• Vendos një listë me kontaktet lokale të emergjencës në një vend të dukshëm si mbi frigorifer apo mbi tavolinën e kafes.
• Thuaju vizitorëve emrin e zakonshëm të lagjes ose zonës (për shembull, komuniteti Mulwood i Calabasas në Kaliforni). Këtë mund ta shtosh te rregullat e shtëpisë dhe ta përfshish edhe në listën e informacioneve të emergjencës.
• Jepu vizitorëve një hartë të zonës që e tregon qartë adresën e pronës, emrat e rrugëve në afërsi, rrugët e shumta të evakuimit dhe vendndodhjet e mundshme të sigurta ku mund të strehohen vizitorët.
• Inkurajoji vizitorët të regjistrohen për marrjen e lajmërimeve lokale të emergjencës dhe të qëndrojnë të përditësuar rreth aktiviteteve të zjarreve, edhe nëse zjarri nuk është pranë pronës sate.
• Bëjua të qartë vizitorëve se nuk është nevoja që të presin një urdhër evakuimi për t'u larguar, veçanërisht pasi mund t'u duhet më shumë kohë për të gjetur rrugën, nëse zona nuk është e njohur për ta.

Për më shumë materiale burimore rreth përgatitjes për zjarret natyrore, mund të kontaktosh departamentin lokal të zjarrfikësve. Nëse je në SHBA, mund t'i referohesh edhe programit Ready, Set, Go! për të kuptuar më shumë rreth zjarreve natyrore dhe për të krijuar një plan veprimi.