Çfarë janë klubet e pritësve të Airbnb?

Sipas të dhënave të Airbnb, pritësit që i bashkohen klubeve të pritësve janë më të suksesshëm se ata që nuk i bashkohen një klubi. Pritësit e rinj që i bashkohen një klubi kanë 86% më shumë gjasa të përfundojnë tre qëndrime sesa ata që nuk janë pjesë e një klubi, si dhe anëtarët gëzojnë të ardhura më të larta dhe kanë më shumë shanse për t'u bërë superpritës.

Siç thotë një pritës: "Më pëlqen të kem një rrjet pritësish vendas për të ndarë materiale burimore dhe ide. Klubi i ndihmon gjithashtu pritësit të kuptojnë ndryshimin e rregullave për pritjen e vizitorëve në qarkun tonë."

Klubet e pritësve të Airbnb janë komunitete pritësish vendas që lidhen virtualisht dhe personalisht për të bërë pyetje, për të ndarë sugjerime, për të festuar arritjet dhe për të diskutuar se si është vërtet të presësh vizitorë.

Grupet drejtohen nga pritës vullnetarë të quajtur drejtues të komunitetit, të cilët fillojnë diskutime, organizojnë takime dhe mundësi për veprimtari vullnetare. Drejtuesit gjithashtu bashkëpunojnë me Airbnb për të ndarë përditësimet më të fundit dhe përmbajtje edukuese për t'i mbajtur anëtarët e klubit të përditësuar.

Të gjitha klubet përdorin grupe private në Facebook, kështu që do të të duhet një llogari për t'iu bashkuar atyre bisedave. Klubet organizojnë gjithashtu takime të hapura për të gjithë pritësit. Disa komunitete i organizojnë takimet me pjesëmarrje fizike, ndërsa të tjerë i organizojnë virtualisht.

Mbi të gjitha, klubet e pritësve janë një rrjet mbështetës, një vend ku mund të shkosh kur ke nevojë për këshilla ose thjesht kur dëshiron të bisedosh me pritës të tjerë.

Gjithçka që të duhet për t'u bërë pjesë e klubit të pritësve është një llogari si pritës në Airbnb dhe një llogari në Facebook. Ka më shumë se 600 klube në mbarë botën në 90 vende, kështu që ka shumë gjasa që të gjesh një të tillë në afërsi. Filloje ti një klub pritësish, nëse në zonën ku jeton nuk ka ende një të tillë.

Pasi të kesh gjetur klubin tënd lokal, mjaftojnë tre hapa për t'u regjistruar:

1. Shko te grupi i Facebook i lidhur në hartë dhe dërgo kërkesën për t'u bërë pjesë i tij.

2. Përgjigjju pyetjeve të anëtarësimit për të na ndihmuar të konfirmojmë llogarinë tënde si pritës.

3. Pasi kërkesa të miratohet, bëhesh pjesë e klubit.

Mbase përfitimi më bindës nga pjesëmarrja në një klub është mundësia për t'u lidhur virtualisht dhe për të marrë sugjerime për listimin ose për t'u drejtuar pyetje pritësve të tjerë rreth pritjes së vizitorëve, qoftë për rregulloret lokale, ose për shërbimet e pastrimit.

Duke qenë se do të kesh mundësinë e takimeve, do të mund të takosh pritës në zonën tënde, gjë që mund të të çojë në miqësi dhe lidhje profesionale ku mund të mbështetesh nëse lind ndonjë problem ose nëse të duhet një nder.

Klubet kanë prezantuar biznese lokale, kanë krijuar iniciativa për ndërgjegjësimin e mjedisit, kanë përkrahur rregullat për qiradhëniet afatshkurtra dhe kanë bërë veprimtari vullnetare së bashku. Takimet shpesh rezultojnë në lidhje të veçanta ose ndikim në komunitet. Dy shembuj:

• Klubi i pritësve në Girona, Spanjë, ftoi një arredues të njohur për një seancë pyetjesh dhe përgjigjesh, ku anëtarët mund të bënin pyetje rreth mënyrave për përmirësimin e ambienteve të tyre.

• Një ekip drejtuesish të komunitetit në Panama organizoi një pastrim të suksesshëm të plazhit për klubin e tyre të pritësve.

Postimet në Facebook shpesh përbëjnë një mundësi për të mbështetur njëri-tjetrin. Shembuj nga klubi i pritësve në Catskills dhe Hudson Valley, Nju Jork:

• Një drejtues i komunitetit pyet se si po shkon sezoni i pritjes së vizitorëve për të gjithë dhe ofron mundësinë e shkëmbimit të ideve për përmirësime.

• Një pritës pyet se si të shmangen mbivendosjet e prenotimeve.

• Një pritës kërkon rekomandime për një ndërtues vendas saune dhe shërbim për heqjen e dëborës.

• Një pritës pyet nëse dikush mund të akomodojë një grup prej 10 personash për një javë.

Informacioni në këtë artikull mund të ketë ndryshuar që nga publikimi.