Bëje hapësirën të spikatë në rrjetet sociale

Duke lundruar nëpër mediat sociale mund të ndihesh sikur ke humbur në pyll. Nga t'ia nisësh? Si të krijosh një përmbajtje të shkëlqyer? Dhe si mund të përkthehet kjo në më shumë prenotime? Tom Feldman, pritës i Tye Haus në Skykomish, Uashington, flet për qasjen e tij të suksesshme (dhe tepër njerëzore) në ndërtimin e një baze ndjekësish dhe kthimin e banesës në një vend që duhet vizituar patjetër.

"Historia jonë me pritjen e vizitorëve filloi në vitin 2012 kur blemë kabinën tonë të parë me strukturë trekëndore, Tye Haus. E rregulluam, e publikuam në Airbnb dhe hapëm një llogari në Instagram me fotografi të banesës dhe pamje të aktiviteteve që mund të bëhen përreth, si shëtitjet tona, atraksionet lokale dhe gjithçka që na pëlqen në zonë. Menjëherë pas kësaj, fotografi i njohur Alex Strohl na kontaktoi dhe na kërkoi një bashkëpunim. I ofruam një qëndrim për dy muaj, si një lloj pushimi kreativ, në këmbim të ndarjes së fotografive në kanalin tonë. Kur filluam të postonim fotografitë e tij, popullariteti ynë filloj të rritej. Ky ishte i pari ndër bashkëpunimet dhe konkurset e shumta që pasuan.

"Unë dhe familja ime po menaxhojmë aktualisht tre kabina me strukturë trekëndore dhe vazhdojmë të presim influencues nga e gjithë bota. Në këmbim të ndarjes së përmbajtjeve të tyre të besueshme në kanalin tonë, u ofrojmë atyre një vend për çlodhje, eksplorim dhe aventura. Kjo është kthyer një nga taktikat tona kryesore të marketingut. Kemi arritur nga një normë qëndrimi prej 30% në afërsisht 100%, duke marrë prenotime si për ditët e javës, ashtu edhe për muajt jashtë sezonit. Kemi ndërtuar gjithashtu një bazë prej gati 115 mijë ndjekësish online. Ja sugjerimet tona se si ta vendosësh banesën tënde në mediat sociale."

"Hapi i parë për promovimin e banesës mund të duket i vogël, por është i rëndësishëm. Është pikërisht vënia e një emri për hapësirën tënde. Do të gjesh një emër të veçantë dhe inteligjent, që mbahet mend lehtë. Më pas, mund të krijosh një markë për banesën tënde dhe ta regjistrosh si emër përdoruesi në Instagram.

"Ja disa pyetje që mund të të ndihmojnë të krijosh një emër:

• Çfarë lloj banese ke? Bëhet fjalë për një chalet apo një pronë buzë detit? Është një shtëpi e stilit Tudor apo një loft?
• Ndjek një motiv të caktuar? A ka arredimi i banesës një stil të veçantë? A ka motive pirate (që ekzistojnë!)?
• A ka ndonjë lidhje me vendndodhjen, qytetin ose qytezën tënde? A mund ta përfshish atë në emrin që do zgjedhësh?
• A ka ndonjë rëndësi historike? Emri i përkryer mund të jetë pas derës së të shkuarës, në pritje që ta hapësh.

"Bëj disa kërkime online dhe zbulo se si kanë vepruar listimet e tjera, si dhe emrat e disponueshëm në mediat sociale. Ne ia vumë emrin kabinës sonë të parë sipas njërit prej lumenjve fqinjë, lumit Tye. Për fjalën e dytë që shkruhet "Haus", u frymëzuam nga një qytet në afërsi me motive bavareze, që quhet Leavenworth. Kështu i vumë emrin Tye Haus".

"Pasi të kesh emrin dhe llogaritë e tua në mediat sociale, do ishte mirë të filloje me publikimin e fotografive të të bukura. Mos fillo, e përsëris, mos fillo me një seri fotosh të këqija. Imazhet në kanalin tënd janë gjëja e parë që u shfaqet njerëzve dhe sigurisht që qëllimi yt është që t'i frymëzosh! Janë pikërisht ato që bëjnë të marrësh prenotime në listimin tënd. Fotografitë e tua duhet të jenë:

• Të rregullta: Pamja duhet të jetë uniforme dhe aspekti estetik i qëllimshëm.
• Me cilësi të lartë: Posto imazhe dhe video të qarta, të gjalla dhe me cilësi të lartë, duke shmangur fotografi të turbullta ose me grimca.
• Reale: Përmbajtja e tyre duhet të pasqyrojë pronën tënde.

"Përpiqu të fotografosh atë që e veçon banesën tënde nga të tjerat. Është ambienti i brendshëm, karakteri i spikatur apo vendndodhja? Zbulo se çfarë e bën pronën tënde vërtet interesante. Ki parasysh se nuk po reklamon vetëm hapësirën tënde, por po tregon gjithashtu përvojën që mund të kenë njerëzit nëse vijnë: vendndodhjen tënde, pamjet përreth dhe aktivitetet në zonë. Nëse nuk bën dot fotografi të mira, konsidero të punësosh një fotograf profesionist si fillim. "

"Një mënyrë tjetër për të krijuar përmbajtje të bukura për kanalin tënd është përmes bashkëpunimit me influencuesit (p.sh. fotografë, blogerë dhe videografë) dhe ofrimit të qëndrimeve me zbritje çmimi në këmbim të përmbajtjes. Të rekomandojmë të kërkosh dhe të kontaktosh fotografë, blogerë, videografë dhe krijues përmbajtjesh në zonën tënde.

"Kjo strategji është një nga promotorët kryesorë të trafikut në faqen tonë. Ndërsa influencuesit ndajnë postime të hapësirës sate, përdoruesit e rinj do ta vënë re dhe do të zbulojnë banesën tënde.

"Kur kontakton me influecuesit për t'u bërë një propozim, është e rëndësishme që:

• Të tregosh profesionalizëm. Përgatitu dhe informohu para bisedës. Bëj pyetjet e duhura që do të ndihmojnë ta zhvillosh bashkëpunimin më tej.
• Të shprehesh qartë. Mund të jetë diçka e thjeshtë si: - 'Hej, më pëlqen puna jote. Po përpiqem të ngre aktivitetin tim në Airbnb. A do të kishe interes të bënim një shkëmbim kreativ: një qëndrim kundrejt disa imazheve apo një shkrimi të besueshëm? ’
• Të specifikosh pritshmëritë e tua. Harto një marrëveshje të ndërsjellë për të dyja palët, në mënyrë që secili nga ju të dijë se çfarë të presë dhe se çfarë do të marrë. Këtu duhet të përfshihen detaje të tilla si datat e dorëzimit, të drejtat e imazheve, etiketimet, numri i imazheve/videove dhe llojet e skedarëve etj.
• Të dyja palët të dalin fituese. Konsideroje si bashkëpunim dhe përpiqu të garantosh që do të jetë e dobishme për të dyja palët.

Një tjetër sugjerim që lidhet me këtë është të mos krijosh asnjëherë boshllëqe. Nëse ke data të lira të minutës së fundit, përfito nga ky pushim për t'u marrë me veprimtaritë e tua të marketingut. Fto një influencues vendas që të qëndrojë tek ty, për ta shfrytëzuar këtë kohë për krijimin e më shumë përmbajtjeve për kanalin tënd.

Pasi ta kesh stabilizuar praninë tënde online dhe të kesh një kanal të mbushur me imazhe fantastike, është koha për t'u njohur edhe më gjerë. Ka disa mënyra për ta bërë këtë:

• Bëhu një ambasador lokal online për zonën tënde. Gjej rrethet përkatëse online dhe bëhu pjesë e tyre. Për Tye Haus, na pëlqen të ndjekim bizneset lokale dhe të etiketojmë vendet përreth në mediat sociale. Për shembull, ndjekim një resort skish në afërsi dhe mund t'u përgjigjemi edhe pyetjeve që lënë të tjerët, ose të komentojmë dhe të themi “Hej, herën tjetër që do vish në qytet, eja rri tek ne.”
• Bashkëpuno me markat për të krijuar konkurse dhe shorte dhuratash. Ne bëjmë edhe konkurse e promocione për të rritur numrin e ndjekësve tanë. Mendo jashtë kornizave për të gjetur bashkëpunime që i përshtaten "markës" sate. Bashkëpunojmë me një kompani që prodhon batanije, shtroja krevati dhe servise për të bërë promocione të ndërsjella. Kontaktuam me ta dhe u thamë: - "Do të marrim disa influencues që të flasin për produktin tuaj, do të ishit të interesuar të bashkëpunonit? Mund të ofroj edhe një qëndrim falas." Këto janë mundësi shumë të mira edhe për të krijuar një bazë të dhënash me email.
  

Në përgjithësi njerëzve nuk u pëlqen vetëpromovimi, qoftë online apo personalisht, prandaj është e rëndësishme të jesh autentik në të gjitha ndërveprimet e tua. Mos komento në çdo postim influencuesish me të njëjtin mesazh, thjesht për t'u dukur si dhe mos bombardo me mesazhe çdo llogari që gjen. Është një fije e hollë që njerëzit e dallojnë kur promovimi i kalon caqet. Shfaq çiltërsi në ato që thua dhe do të tërheqësh njerëzit e duhur.

Personalisht e kam parim që të mos e teproj me hashtag-et. Etiketojmë në fotografi vetëm disa kanale që kanë lidhje me ne dhe përfshijmë vetëm 5-10 hashtag-e për postim. Ka njerëz që përdorin një mori etiketimesh dhe hashtag-esh nëpër fotografi për të dalë në pah, por personalisht preferoj një qasje më të shtruar dhe të natyrshme.

Ki parasysh se ndërtimi i një baze ndjekësish kërkon kohë dhe sigurisht nuk ndodh brenda natës. Të inkurajoj t'i zbatosh këto këshilla, të bëhesh kreativ dhe pa dyshim që do të ndiesh një rritje jo vetëm të komunitetit në mediat sociale por edhe të normave të tua të qëndrimit.

Pritje të mbarë vizitorësh!
Tom